ئاشقانە

دەمزانی لە حافتا ساڵیش دا
ئاشقانەکانم
بیست ساڵەکانیش ئێرەیی پێ دەبەن

بازجووەکەم پرسی
سیاسی ت؟
ئاشقانەیێکم بۆ خوێندەوە
وتی: بینووسە و واژۆی کە!
نووسیم و واژۆم نەکرد
وتی: واژۆت کردبا ئازادم دەکردی

نەمزانی لە حەفتا ساڵیشدا
ئاشقانەکانم
بەردیش نەرم دەکا...

محەمەد عەلی بەهمەنی
وە: سۆران محەمەدی

"بریا که‌سێک تێده‌گه‌ییشت"

ئارام بنوو کرێکاره‌کان خه‌ریکی کارن!
له‌‌سه‌ر ئه‌ستوونده‌کی له‌شت
من کرێکاره‌کانم
ده‌ردێک که‌ نایڵێم
که‌ ناهێنێ ره‌شه‌با شه‌ونمێ به‌ گۆنای گوڵت
که‌ په‌پووله‌ له‌ سه‌ر کام پێڵووت ئه‌خه‌وێ هه‌ر شه‌و
که‌ هه‌تاو له‌ کام شانت سه‌رده‌که‌وێ هه‌ر رۆژ
که‌ مانگشه‌و بێلانه‌ جۆلانه‌ ده‌کات له‌و بسکانه‌ت هه‌ر شه‌و و رۆژ و
بێ لانم ده‌کات لانکی ددانت کاتی لاواندنه‌وه‌ و
ئه‌مه‌یش بۆ له‌ ناوچوونی پێاوێک به‌سه‌
پێکه‌نینت ئه‌توانێ ئیمانی له‌ده‌سچوو بگه‌ڕێنێته‌وه‌ دڵ
پێش له‌ مردن
دووری، وه‌کوو دوایین نهۆمی باڵاخانه‌یێک
به‌خته‌وه‌ر ئه‌و کرێکاره‌ی
که‌ له‌ باڵای تۆوه‌ دابکه‌وێت
من نرخی ژیانم داوه‌
ده‌یان جار له‌به‌رچاوت که‌وتووم و
نرخی ئه‌وین خۆشه‌ویستییه‌
خۆشم ئه‌وێیت
ئه‌ی ئه‌وه‌ی هه‌بوونت
مردن دوا ده‌خات

سابیر هاکا
وە: سۆران محەمەدی

پرسیار

تۆ چ خوێن شیرینی ئەی ژن
بەتایبەت
کاتێ کە لە نێوان دوو ئەشکەنجەدا دیتە خەونم
دڵم، هەڵبەت، بەتووندی لێئەدات
بەڵام نازانم
بەبۆنەی ئەم خەونە سەوزەیە وا خونچە دەکات؟
یان بەهۆی ئەشکەنجەیێک کە چاوەروانی شانە لەرزۆکەکانن؟
هەمیشە لە خۆم ئەپرسم:
بۆ ئەو کاتەی کە لەگەڵ تۆ نەبووم، لەگەڵ تۆ نەبووم؟
وە لە نێوان دوو ئەشکەنجەدا
ئەم پرسیارە، بەردەوام بەرامبەرمدا وەک نیگایێکی رەمزاوی راوستاوە
بڵێی سەردەمێک بێت
کە من دیسان بە ئەختیاری خۆم لە تەنیشتی تۆ دا ببم، یان لە تەنیشتتدا نەبم؟
ئەو کات چلۆن ئەگونجێ بیر لەوە بکەم کە بمەوێ تەنانەت چرکەیێک لە تەنیشتی تۆدا نەبم؟

"رەزا بەراهەنی"
وە: سۆران محەمەدی

حیڵاکی

له‌ یه‌که‌م پێکه‌نینته‌وه‌

یه‌که‌م شادومانی بچکۆله‌ی ژیان

که‌ هاته‌ ناو دونیامه‌وه‌

 

له‌ یه‌که‌مین پێڵاوی بچکۆله‌ی هه‌رزانت

یه‌که‌مین ده‌نگدانه‌وه‌ی به‌ تاوی به‌ختیاری

که‌ به‌سه‌ر خه‌ڵوه‌تی خانوومدا رۆنیشت

 

له‌ یه‌که‌م قه‌ڵه‌می ره‌شی نووک تیژت و

یه‌که‌م نامه‌ی ئاشقانه‌ت

که‌ "عاضیزم توو حی من ی"

ساڵانێکه‌ تێپه‌ڕیوه‌ و

من ئێجگار حیڵاکم

زۆر حیڵاکم و

حیڵاکیه‌که‌ی له‌و شتانه‌یه‌

که‌ نامه‌وێ شێوازی نووسینه‌که‌ی بزانی.

 

دایکت بمرێ ڕۆڵە!

له‌ ژیاندا شتی زۆر هه‌یه‌

که‌ ئه‌نجام فێری ده‌بی

به‌ بێ ئه‌وه‌ی شێوازی درووستی نووسینی بزانی.

لیلا کردبچە

وە: سۆران محەمەدی

شەوی بیستەم

له‌ کۆتایی ره‌سته‌یێکدا ده‌سپێده‌که‌م و

ده‌بینم تامی جگه‌ره‌م گۆڕاوه‌

هێشتا خۆشم ده‌وێی به‌ چه‌شنێ ده‌رئه‌بڕی که‌ هه‌ڵبه‌ت ته‌واو بووه‌

کپ ده‌بم تاقمانه‌جووت له‌ سه‌ره‌تای ره‌سته‌یێک دا که‌ نایڵێم

چه‌نده‌ ئینتیزاعی تر له‌ خودا راوه‌ستاوی له‌ هزرم دا !

چه‌نده‌ لێت ئه‌ڕوانم خه‌مناکتر له‌ پرسه‌کردنێک

چه‌نده‌ ناڕۆیت کاتێ که‌ ناکرێ ببی

کاتێ تامی جگه‌ره‌م گۆڕاوه‌

سه‌ر و بن ده‌گرم ئه‌و وشانه‌ی که‌ ده‌بنه‌ دووکه‌ڵ و ده‌سووتێ لێوم

هێشتا خۆشم ده‌وێی خه‌مناکتره‌ له‌ پرسه‌کردنێک

چه‌نده‌ ناڕۆیت تاقمانه‌جووتی ره‌سته‌یێک که‌ نایڵێم

چه‌نده‌ ئینتیزاعی تر له‌ روانین له‌ کۆتایی بێده‌نگی دا

چه‌نده‌ راوه‌ستاوی/ کاتێک که‌ ناکرێ هه‌ڵبه‌ت/ ته‌واو بووه‌.

 

لەیلا سادقی

وه‌: سۆران محه‌مه‌دی